بھارتی کوریو گرافر ریمو ڈیسوزا اور ان کی اہلیہ لیزیل ڈی سوزا پر ڈانسرز کیساتھ 11 کروڑ روپے فراڈ کرنے کا الزام عائد کیا گیا ہے جن کے خلاف مقدمہ درج کرلیا گیا۔
بھارتی میڈیا رپورٹ کے مطابق مہاراشٹر میں ایک ڈانس گروپ کی جانب سے کوریوگرافر ریمو ڈی سوزا اور انکی اہلیہ کے خلاف 11.96 کروڑ (تقریبا 12 کروڑ) روپے کی دھوکہ دہی کے الزام میں مقدمہ درج کروایا گیا ہے، پولیس نے بتایا کہ ہفتہ کو پانچ دیگر افراد کے خلاف بھی مقدمہ درج کیا گیا۔
ایک پولیس اہلکار نے بتایا کہ 26 سالہ ڈانسر کی شکایت پر درج کیا گیا، میرا روڈ پولیس اسٹیشن میں 16 اکتوبر کو ریمو ان کی اہلیہ اور پانچ دیگر کے خلاف دفعہ 465 (جعل سازی)، 420 (دھوکہ دہی) اور تعزیرات ہند کی مختلف دفعات کے تحت مقدمہ درج کیا گیا۔
مذکورہ ایف آئی میں درج تفصیل میں بتایا گیا کہ شکایت کنندہ اور اس کے گروپ کے ساتھ 2018 سے جولائی 2024 کے درمیان مبینہ طور پر دھوکہ دہی کی گئی تھی۔
میڈیا رپورٹ کے مطابق مقدمے میں کہا گیا کہ ڈانس گروپ نے ایک ٹیلی ویژن ڈانس شو میں پرفارم کر کے ایونٹ جیتا جبکہ ملزم نے مبینہ طور پر ایسا ظاہر کیا جیسے یہ گروپ ان کا ہے اور 11.96 کروڑ روپے کی انعامی رقم ہتھیا لی۔
اس معاملے کے دیگر ملزمان میں اوم پرکاش شنکر چوہان، روہت جادھو، فریم پروڈکشن کمپنی، ونود راؤت، ایک پولیس اہلکار اور رمیش گپتا شامل ہیں، پولیس نے بتایا کہ معاملے کی مزید تحقیقات کی جارہی ہیں۔
واضح رہے کہ معروف بھارتی ہدایتکار ریمو ڈیسوزا کوریوگرافر ہونے کے علاوہ 2009 سے کئی ڈانس ریئلٹی شوز میں جج کے فرائض انجام دیتے رہے ہیں۔ وہ ڈانس انڈیا ڈانس، جھلک دکھلا جا، ڈانس کے سپر اسٹارز، ڈانس پلس، ڈانس چیمپئنز، انڈیاز بیسٹ ڈانسر، ڈی آئی ڈی جیسے شوز کے جج رہ چکے ہیں۔
