تعلیمی اداروں میں ہراسانی اور احتجاج کے واقعات کی تحقیقات کیلئے ایف آئی اے لاہور زون نے تین تحقیقاتی کمیٹیاں تشکیل دے دی ہیں۔

ذرائع کے مطابق ایڈیشنل ڈائریکٹر عائشہ آغا خان تینوں ٹیموں کی نگرانی اور ملوث افراد کی گرفتاریوں کیلئے اقدامات کریں گی۔

تحقیقاتی کمیٹیاں نجی کالج، لاہور کالج فار ویمن یونیورسٹی اور پنجاب یونیورسٹی واقعات کی تحقیق کریں گی۔

ایڈیشنل ڈائریکٹر ایف آئی اے عائشہ آغا خان زونل آفس اور سائبر کرائم سیل میں کوارڈینیٹ کریں گی۔ سات رکنی ٹیم اے نجی کالج میں مبینہ زیادتی کی خبر کی تحقیقات کرے گی۔ سات رکنی ٹیم اے کی سربراہی ڈپٹی ڈائریکٹر محمد سلیمان لیاقت کریں گے۔

پنجاب یونیورسٹی ہاسٹل میں طالبہ کی خودکشی کی تحقیقات ایڈیشنل ڈائریکٹر کاشف مصطفی کی سربراہی میں چھ رکنی ٹیم کرے گی جبکہ ایف آئی اے کے ڈپٹی ڈائریکٹر کی سربراہی میں چار رکنی ٹیم سی لاہور کالج فار ویمن یونیورسٹی میں ہراسانی کی تحقیقات کرے گی۔