قوم کے لیے اسٹیٹ بینک آف پاکستان کی طرف سے ایک اچھی خبر یہ آئی ہے کہ ڈھائی سال میں پہلی بار ملک کے زرِمبادلہ کے ذخائر گیارہ ارب ڈالر سے زیادہ ہوگئے ہیں۔

اسٹیٹ بینک آف پاکستان نے ہفتہ وار بنیاد پر جاری کردہ ڈیٹا میں بتایا ہے کہ ایک ہفتے کے دوران زرِمبادلہ کے ذخائر میں 21 کروڑ 50 لاکھ ڈالر کا اضافہ ہوا۔

اسٹیٹ بینک آف پاکستان کے جاری کردہ اعداد و شمار کے مطابق 11 اکتوبر کو ایس بی پی میں زرِمبادلہ کے ذخائر 11.023 ارب ڈالر کی سطح پر رہے۔ 4 اکتوبر کو زرِمبادلہ کے ذخائر 10.808 ارب ڈالر کی سطح پر ریکارڈ کیے گئے تھے۔

اسٹیٹ بینک آف پاکستان کے ذخائر سمیت ملک بھر میں موجود زرِمبادلہ کی سطح اس وقت 6 کروڑ 40 لاکھ ڈالر کے اضافے سے 16.111 ارب ڈالر ہے۔ تجارتی بینکوں میں موجود زرِمبادلہ کا مجموعی حجم ایک ہفتے کے دوران 15 کروڑ ڈالر کی کمی سے 5.089 ارب ڈالر ہے۔ یکم اپریل 2022 کو زرِمبادلہ کے ذخائر 11.319 ارب ڈالر کی سطح پر تھے۔