خیبر پختونخوا کے گورنر فیصل کریم کنڈی نے کہا ہے کہ کل ون پوائنٹ ایجنڈے پر خوش گوار ماحول میں بات ہوئی ہے۔ سیاسی اختلافات تو چلتے ہی رہتے ہیں۔
پشاور میں نیوز کانفرنس سے خطاب کرتے ہوئے فیصل کریم کنڈی نے کہا کہ پیپلز پارٹی نے ہمیشہ جمہوریت کے لیے قربانیاں دی ہیں۔
ایک سوال پر ان کا کہنا تھا کہ خیبر پختونخوا کے وزیرِاعلیٰ نے جرگے میں شرکت کی دعوت دی تھی۔ ہم نے تمام سیاسی اختلافات بالائے طاق رکھ کر جرگے میں شرکت کی۔
فیصل کریم کنڈی کا کہنا تھا کہ ملک کو جن حالات کا سامنا ہے اُن کے تحت کسی سطح پر کشیدگی کی گنجائش نہیں۔ معاملات کو افہام و تفہیم کے ذریعے طے کرنے کی اشد ضرورت ہے۔
ایک اور سوال کے جواب میں خیبر پختونخوا کے گورنر نے کہا کہ وزیراعظم سے بھی صوبے کے امن سے متعلق بات چیت ہوئی ہے۔
اس وقت امن و استحکام بنیادی ضرورت ہے تاکہ کاروبار دوست ماحول پیدا ہو اور معیشت کا پہیہ تیزی سے گھومے۔
فیصل کریم کنڈی کا کہنا تھا کہ تمام سیاسی یا نظریاتی اختلافات کو ایک طرف ہٹاکر قومی یکجہتی کی سوچ پیدا کرنے کی ضرورت ہے۔
