کراچی میں تیز آندھی کے باعث تاجر یونین کے صدر چھت سے گر کر جاں بحق ہوگئے۔
افسوس ناک واقعہ شاہ فیصل کالونی نمبر 2 شمع شاپنگ سینٹر کے قریب تیز ہواؤں کے باعث پیش آیا، مقامی تاجر 4 منزلہ عمارت کی چھت سے گر کر جاں بحق ہوگیا۔
ریسکیو حکام کے مطابق متوفی کی شناخت 48 سالہ وسیم احمد کے نام سے کی گئی۔
ایس ایچ او شاہ فیصل کالونی انسپکٹر عبدالحمید کھوکھر نے بتایا کہ متوفی شمع شاپنگ سینٹر کی یونین کا صدر تھا جو دوپہر میں تیز ہوائیں چلنے کی وجہ سے اپنی رہائشی 4 منزلہ عمارت کی چھت پر سولر پلیٹس کی دیکھنے گیا تھا۔
تیز ہواؤں کی وجہ سے اتفاقیہ طور پر بلندی سے گر کر جاں بحق ہوگیا جبکہ متوفی کی شمع شاپنگ سینٹر میں گارمنٹس کی دکانیں ہیں، پولیس نے ضابطے کی کارروائی کے بعد لاش ورثا کے حوالے کردی ہے۔
