امریکی ریاست فلوریڈا کو صدی کے طاقت ور ترین سمندری طوفان ملٹن سے خطرہ ہے اور حکام کی جانب سے 10 لاکھ سے زائد افراد کو انخلا کا حکم ملتے ہی فلوریڈا کی مرکزی شاہراؤں پر گاڑیوں کی لمبی قطاریں لگ گئی ہیں۔

دی گارجین کی رپورٹ کے مطابق 200 میل فی گھنٹہ ہواؤں کے ساتھ کیٹیگری 5 کے سمندری طوفان کی شدت نئی کیٹیگری 6 کی سطح پر بھی جا سکتا ہے۔

میامی میں نیشنل ہریکین سینٹر نے آدھی رات کی ایڈوائزری میں خبردار کیا کہ ’محفوظ مقام پر منتقل ہونے کے لیے بدھ کا انتظار نہ کیا جائے کیونکہ لوگوں کے پاس زیادہ وقت نہیں ہوگا۔

طوفان کے پیش نظر اور نقل مکانی کے لیے لوگوں نے اپنی گاڑیوں کی ٹینکی پیٹرول سے فل کرالی جس کے بعد متعدد پیٹرول پمپس پر پیٹرول کی عدم دستیابی کی سائن بورڈ آویزاں کردیے گئے۔ گیس بڈی کی رپورٹ کے مطابق منگل کی شام ساڑھے چھ بجے تک فلوریڈا میں 7 ہزار 912 پیٹرول اسٹیشنوں سے ایندھن ختم ہونے کی اطلاعات موصول ہوچکی ہیں۔

کنڈر مورگن نے اپنا سینٹرل فلوریڈا پائپ لائن سسٹم بند کر دیا ہے، جو ٹمپا اور اورلینڈو کے درمیان بہتر مصنوعات منتقل کرتا ہے۔ تاہم، امید ہے کہ ٹرک اورلینڈو کے ہول سیل ریک سے ایندھن لینے کے قابل ہو جائیں گے۔

سمندری طوفان کے متاثرین نے اورلینڈو کے تمام ہوٹلز میں پناہ لی ہے جہاں کبھی سیاحوں اور کنونشن میں جانے والوں کا رش ہوتا تھا۔ غیرملکی خبررساں ادارے ’اے ایف پی‘ کے مطابق امریکی صدر جو بائیڈن نے ممکنہ متاثرہ علاقوں کے شہریوں کو محفوظ مقامات پر منتقل ہونے کی بھی ہدایت کی ہے۔

نشیبی ساحلی علاقے کلیئر واٹر اور سینٹ پیٹرزبرگ میں آباد خاندانوں نے گھروں کو خالی کردیا جہاں طوفان ملٹن کی لہریں 15 فٹ تک پہنچ سکتی ہیں۔

خبر ایجنسی کے مطابق طوفان کے خدشے پر دیگر علاقوں میں سپر مارکیٹوں کے شیلفس اشیائے خور و نوش سے خالی ہوگئے۔ محکمہ موسمیات کے مطابق متاثرہ علاقوں میں 15 انچ تک بارشیں ہونے کا بھی امکان ہے۔