ملائیشیا کے وزیر اعظم داتو سیری انور بن ابراہیم تین روزہ سرکاری دورے پر اسلام آباد پہنچ گئے ہیں۔ وزیراعظم شہباز شریف نے نور خان ایئربیس پر ملائیشین ہم منصب کا استقبال کیا۔
نائب وزیراعظم اسحاق ڈار اور وفاقی کابینہ کےارکان بھی استقبال کے لئے موجود تھے، روایتی لباس میں ملبوس بچوں نے وزیراعظم انور ابراہیم کو پھول پیش کیے۔
ملائیشین وزیراعظم کے ہمراہ ایک اعلیٰ سطحی وفد بھی ہے جس میں وزرا ، نائب وزرا اور سینئر حکام شامل ہیں۔ پاک فوج کے چاق و چوبند دستے نے معزز مہمان کو سلامی بھی دی۔
دورے کے دوران وزیر اعظم انور ابراہیم پاکستانی قیادت سے ملاقاتیں کریں گے۔
فریقین تجارت، رابطے، توانائی، زراعت، حلال انڈسٹری، سیاحت، ثقافتی تبادلوں اور عوامی سطح پر رابطوں سمیت مختلف شعبوں میں پاکستان اور ملائیشیا کے تعلقات کو مزید مستحکم کرنے کے لیے وسیع ایجنڈے پر تبادلہ خیال کریں گے۔
اس موقع پر علاقائی اور عالمی پیش رفت پر بھی تبادلہ خیال کیا جائے گا۔
