وزیرِ اعظم شہباز شریف دورہ امریکا اور برطانیہ سے وطن واپس پہنچ گئے۔
ایوی ایشن ذرائع کے مطابق وزیراعظم شہباز شریف اقوام متحدہ کی جنرل اسمبلی سے خطاب کے لیے امریکا گئے تھے، جہاں 3 دن قبل امریکا سے واپسی پر لندن روانہ ہوئے۔
شہباز شریف لندن میں 3 دن قیام کے بعد آج صبح اسلام آباد پہنچے ہیں تاہم وفاقی کابینہ کا آج ہونے والا اجلاس ملتوی کر دیا گیا۔
اپنے دورے کے دوران وزیراعظم نے لندن میں ایجوئر روڈ پر واقع اپنی رہائش گاہ پر قیام کیا اور سینئر صحافیوں سے ملاقات بھی کی۔
واضح رہے کہ وزیراعظم شہباز شریف نے امریکا میں اقوام متحدہ کی جنرل اسمبلی کے اجلاس سے خطاب کیا تھا، اپنے خطاب میں انہوں نے کہا کہ غزہ میں جاری مظالم کی صرف مذمت کافی نہیں بلکہ اس بربریت کو فوری طور پر رکنا چاہیئے۔
علاوہ ازیں وزیرِ اعظم نے برطانوی ہم منصب کیئر اسٹارمر سمیت کئی اہم شخصیات سے بھی ملاقات کی تھی۔
