فیڈرل بورڈ آف ریونیو (ایف بی آر) کے دفاتر انکم ٹیکس گوشوارے جمع کرنے کے لیے آج (اتوار) کو بھی کھلے رہیں گے۔
انکم ٹیکس گوشوارے جمع کرانے کے لیے صرف ایک روز باقی رہ گیا، انکم ٹیکس گوشوارے جمع کرانے کی پیر کو آخری تاریخ ہے۔
ایف بی آر کی ویب سائٹ تک رسائی میں شہریوں کو مشکلات کا سامنا ہے، آئی آر آئی ایس سسٹم بیٹھنے کے باعث شہری ریٹرن فائل کرنے سے قاصر ہیں۔
فیڈرل بورڈ آف ریونیو (ایف بی آر) ذرائع کا کہنا ہےکہ ویب سائٹ کے تکنیکی مسائل کے ازالے کے لیے مناسب وقت دیا جائے گا، یقینی بنائیں گے کہ کوئی شہری ٹیکس ریٹرن جمع کرانے سے محروم نہ رہے۔
ایف بی آر کا سسٹم بیٹھ گیا، گوشوارے جمع کروانے میں مشکلات
ایف بی آر کے مطابق ٹیکس گوشوارے جمع کرانے کے لیے ایف بی آر کے دفاتر اتوار کو بھی کھلے رہیں گے۔
واضح رہے کہ ایف بی آر نے ٹیکس گوشوارے جمع کرانے کے لیے 30 ستمبر تک کا وقت دیا ہوا ہے جس میں توسیع نہیں کی جائے گی۔
دوسری جانب وفاق ایوان ہائے صنعت و تجارت اور کراچی چیمبر آف کامرس اینڈ انڈسٹری نے انکم ٹیکس گوشوارے جمع کرانے میں مشکلات پر اظہارِ تشویش کرتے ہوئے ٹیکس ریٹرن جمع کرانے کی تاریخ میں ایک ماہ کے اضافے کا مطالبہ کیا ہے۔
