امریکا کے شہر ساکرامینٹو کے ایک مندر کی دیواروں پر نامعلوم شرپسندوں نے نعرہ لکھ دیا کہ ہندوؤ، واپس جاؤ۔ یہ دس دن میں اپنی نوعیت کا دوسرا واقعہ ہے۔ اس سے قبل نیو یارک کے ایک مندر کی دیواروں پر بھی یہی نعرہ لکھا گیا تھا۔
ساکرامینٹو کے باپز سوامی نارائن مندر کی دیواروں پر ہندوؤں سے اظہارِ نفرت کا نعرہ لکھنے کے ساتھ ساتھ اس پراپرٹ کو پانی کی سپلائی بھی کاٹ دی گئی ہے۔
ساکرامینٹو کاؤنٹی کے ترجمان نے سوشل میڈیا پلیٹ فارم ایکس پر ایک پوسٹ میں کہا کہ یہ سب کچھ انتہائی ناقابلِ برداشت ہے۔ معاشرے کو تقسیم کرنے کی کسی کو اجازت نہیں دی جائے گی۔ تحقیقات کی جارہی ہے۔ جو بھی قصور وار پایا گیا اُسے قرار واقعی سزا دی جائے گی۔
بھارتی نژاد امریکی کانگریس ممبر ایمی بیرا نے ایک بیان میں کہا کہ مذہب کی بنیاد پر نفرت پھیلانے کی کوئی گنجائش نہیں۔ جو لوگ ایسا کر رہے ہیں اُنہیں سزا بھگتنا پڑے گی۔ ان کا کہنا تھا کہ کسی بھی امن پسند کمیونٹی کے جذبات سے کھلواڑ کی اجازت نہیں دی جاسکتی۔
ساکرامینٹو کے جس مندر کی دیوار پر مذہبی منافرت والی تحریر لکھی گئی تھی اس ہندوؤں نے پوجا کا اہتمام کیا اور اس موقع پر کمیونٹی لیڈرز نے کہا کہ وہ پُرامن رہیں اور کسی بھی ناخوش گوار واقعے کی سازش کو مکمل طور پر ناکام بنادیں۔ اُن کا کہنا تھا کہ بہت زیادہ مشتعل ہونے کی صورت میں معاملات بگڑتے ہیں۔ یہ واقعہ صبر و تحمل کا متقاضی ہے۔
