سوشل میڈیا پر ایک ایسے بچے کی ویڈیو وائرل ہوئی ہے جو بھرپور اعتماد کے ساتھ پولیس سے شکایت کرتے ہوئے مطالبہ کر رہا ہے کہ مرغی چور کو پکڑو۔
ویڈیو میں اسکول یونیفارم پہنا ہوا بچہ پولیس اہلکار سے مرغی چرائے جانے کی شکایت پنجابی میں کر رہا ہے۔ وہ پولیس پر زور دے رہا ہے کہ ملزم کے خلاف کارروائی کی جائے۔
جب پولیس اہلکار اُس سے کہتا ہے کہ اگر کارروائی کرنی ہے تو پرچہ کٹوانا پڑے گا۔ اس پر بچہ جھٹ پوچھتا ہے پرچہ کتنے میں کٹے گا۔ پولیس اہلکار بتاتا ہے کہ پرچہ کٹوانے کے لیے کچھ خرچ نہیں کرنا پڑتا۔
بچہ پولیس اہلکار کو بتاتا ہے کہ پہلے یہاں جو پولیس افسر تھا وہ اس کا دوست تھا جس نے چوزہ چرائے جانے کی شکایت پر کارروائی کرکے ملزم کو پکڑا تھا۔
بچے نے پولیس اہلکار کو بتایا کہ جب وہ پانی بھرنے آئے گا تو وہ ملزم کی نشاندہی کردے گا۔ بچے کے اعتماد اور معصومیت سے مزین یہ ویڈیو سوشل میڈیا پر بہت مقبول ہوئی ہے۔
