کراچی میں ڈکیتی مزاحمت پر ایک اور شہری کی جان چلی گئی۔ ڈاکوؤں کی فائرنگ سے باپ بیٹا زخمی ہو گیا۔ جبکہ بیٹے کی فائرنگ سے زخمی ڈاکو ہلاک ہو گیا ہے۔
افسوس ناک واقعہ بلال چورنگی کے قریب پیش آیا، آج نیوز کو موصول ہونے والی سی سی ٹی وی فوٹیج کے مطابق مقتول عبدالمالک کو اپنے بیٹے کے ساتھ گاڑی سے آتے دیکھا جاسکتا ہے، مقتول بینک سے دس لاکھ کیش رقم نکال کر لارہا تھا کہ عقب سے دو موٹرسائیکلوں پر تین ملزمان پہنچے ملزمان نے اسلحہ نکالا اور لوٹ مار کی کوشش کی۔
مقتول نے ملزمان کو دیکھتے ہی رقم کا بیگ ہوا میں دور پھینکا جس پر ڈاکووں نے عبدالمالک کو گولیاں ماری، ایک ڈاکو نے بیگ اٹھایا تو اس میں سے آدھی رقم زمین پر گری، رقم زمین پر گری اور ہوا سے اڑنے لگی تو لوگ جمع ہوگئے۔
کراچی میں ڈکیتی مزاحمت پر شہری قتل، عوام نے ڈاکو مار دیا
شہری رقم لوٹنے لگے کہ گاڑی سے مقتول کا بیٹا نکلا، مقتول کے بیٹے نے موٹرسائیکل سوار ڈاکو پر گولیاں چلائی، ڈاکو کو گولیاں لگی تو وہ زمین پر گرگیا جس کے بعد موٹرسائیکل سوار ڈاکو بھاگے تو مقتول کا بیٹا پیچھے بھاگا، ملزمان نے اسے بھی گولیاں ماری جس سے وہ زمین پر گرگیا۔
پولیس کے مطابق ہلاک اور زخمی باپ بیٹے کو جناح اسپتال منتقل کردیا گیا ہے۔ جبکہ گرفتار زخمی ملزم نے بھی دوران علاج دم توڑ دیا ہے۔
پولیس کا کہنا ہے کہ ڈاکوؤں نے 3 لاکھ روپے لوٹے ہیں جبکہ 7 لاکھ سے زائد رقم شہریوں نے سمیٹ لی ہے۔
