امریکا میں ری پبلکن پارٹی کے صدارتی امیدوار ڈونلڈ ٹرمپ نے صدارتی انتخابات ہار جانے کی صورت میں اپنے آئندہ کے منصوبے کا اعلان کر دیا، انہوں نے کہا کہ وہ نومبر میں ہونے والے امریکی صدارتی انتخابات بھارتی اکثریت سے جیت جائیں گے، اگر وہ نومبر میں صدارتی الیکشن ہار گئے تو وہ دوبارہ نہیں لڑیں گے۔
میڈیا رپورٹس کے مطابق ڈونلڈ ٹرمپ اپنی ری پبلکن پارٹی کی جانب سے مسلسل تیسری مرتبہ صدارتی انتخابات میں حصہ لے رہے ہیں اور ممکنہ طور پر یہ ان کے آخری انتخابات ہوں گے۔
میڈیا سے گفتگو کے دوران ڈونلڈ ٹرمپ کا کہنا تھا کہ مباحثے کے لیے اب بہت دیر ہوچکی ہے، ووٹنگ شروع ہے، وہ نومبر میں ہونے والے امریکا کے صدارتی انتخابات بھاری اکثریت سے جیت جائیں گے، اگر وہ کملا ہیرس سے ہار گئے تو یہ ان کے آخری انتخابات ہوں گے تاہم انہیں امید ہے کہ وہ 5 نومبر کو ہونے والے انتخابات میں کامیاب ہو جائیں گے۔
کملا ہیرس کا ایک اور مباحثے کا چیلنج، ٹرمپ کا انکار
امریکا میں صدارتی الیکشن کے لیے قبل ازوقت ووٹنگ کا آغاز
واضح رہے کہ امریکا میں صدارتی انتخابات 5نومبر کو ہوں گے، انتخابات سے قبل ہونے والے مقبولیت کے سرویز میں موجودہ امریکی نائب صدر اور ڈیموکریٹک پارٹی کی صدارتی امیدوار کملا ہیرس اور ڈونلڈ ٹرمپ میں سخت مقابلے کا امکان ہے۔
موجودہ امریکی صدر جوبائیڈن کی جانب سے صدارتی دوڑ سے باہر ہونے کے بعد ڈیموکریٹک پارٹی کی حمایت میں اضافہ دیکھا گیا ہے۔
خیال رہے کہ 2020 کے صدارتی انتخابات میں جوبائیڈن، ڈونلڈ ٹرمپ کو شکست دے کر صدر منتخب ہوئے تھے تاہم ڈونلڈ ٹرمپ نے اپنی شکست تسلیم نہیں کی تھی، اسی دوران 6 جنوری 2021 کو ٹرمپ کی ریلی کے بعد ٹرمپ کے حامیوں نے کیپٹل ہل پر حملہ کردیا تھا۔
