واٹس ایپ اور انسٹاگرام کے پاکستانی صارفین ہفتے کے روز ایپلی کیشن میں بندش کی شکایات کرتے نظر آئے ہیں، جبکہ زونگ اور پی ٹی سی ایل کی جانب سے فراہم کردہ انٹرنیٹ سروسز میں رکاوٹوں کی بھی اطلاعات سامنے آئی ہیں۔
انٹرنیٹ بندش سے باخبر رہنے والی ویب سائٹ ”ڈاؤن ڈیٹیکٹر“ (Down Detector) کے مطابق انسٹاگرام صارفین نے آج ایک گھنٹے کے دوران بندش کی تقریباً 86 اطلاعات رپورٹ کیں۔
واٹس ایپ صارفین نے صبح 10 بج کر 45 منٹ سے مسائل کی اطلاع دینا شروع کی، خاص طور پر وائس نوٹ بھیجنے میں مشکلات دیکھنے میں آئیں۔
ڈاؤن ڈیٹیکٹر نے مزید کہا کہ نیٹ ورک فراہم کرنے والے زونگ اور پی ٹی سی ایل نے بھی آج صبح سے سروسز میں خلل کی اطلاع دی ہے۔
پاکستان ٹیلی کمیونیکیشن اتھارٹی (پی ٹی اے) نے ابھی تک اس پر کوئی تبصرہ نہیں کیا ہے۔
تاہم، اگست میں، پی ٹی اے نے کہا تھا کہ ملک بھر میں انٹرنیٹ سروسز ”اکتوبر کے شروع“ تک سست رہنے کی توقع ہے ، کیونکہ اس وقت تک رکاوٹوں کی ذمہ دار سب میرین کیبل کی مرمت کر دی جائے گی۔
پی ٹی اے نے کہا کہ ’ملک بھر میں جاری انٹرنیٹ کی سست روی بنیادی طور پر پاکستان کو بین الاقوامی سطح پر جوڑنے والی سات بین الاقوامی سب میرین کیبلز میں سے دو (SMW4, AAE-1) میں خرابی کی وجہ سے ہے۔‘
ٹیلی کام اتھارٹی نے مزید کہا کہ ’SMW-4 سب میرین کیبل میں خرابی اکتوبر 2024 کے اوائل تک ٹھیک ہونے کا امکان ہے، جبکہ سب میرین کیبل AAE-1 کی مرمت کر دی گئی ہے جس سے انٹرنیٹ کی سہولت بہتر ہو سکتی ہے۔‘
