کراچی پولیس نے نادرن بائی پاس پر کارروائی کرتے ہوئے حیدرآباد سے کراچی کے لیے بک کرائی گئی کار چھیننے والے 3 ملزمان کو گرفتار کرلیا جبکہ ملزمان سے چھینی گئی ٹویوٹا کرولا برآمد کرلی گئی۔

نادرن بائی پاس کراچی سے گرفتار تینوں ملزمان نے حیدرآباد رینٹ اے کار سے کراچی کے لیے گاڑی بک کروائی تھی، ملزمان نے انڈس چوکی عمر بروہی گوٹھ کے قریب ڈرائیور کو زخمی کرکے کار چھینی، جس کا مقدمہ گلشن معمارتھانے میں درج ہے۔

پولیس کی کارروائی کے دوران گرفتار ہونے والے ملزمان میں محمد علی مغیری، سلیم کھوسو اور راہول کمار شامل ہیں۔

ملزمان محمد علی مغیری اور سلیم کھوسو ڈکیتی اور منشیات کے مقدمات میں اس سے قبل بھی جیل جا چکے ہیں، ملزمان سرقہ شدہ گاڑیوں کو گوادر میں جعفر نامی شخص کو فروخت کرتے ہیں۔

پولیس نے ساتھیوں کی گرفتاری اور مزید گاڑیوں کی برآمدگی کے لئے چھاپہ مارکارروائی شروع کردی۔