قومی احتساب بیورو (نیب) کے ڈپٹی چیئرمین نے اراکین اسمبلی کے خلاف گمنام اور جعلی ناموں سے درج درخواستوں پر کارروائی کے حوالے سے بڑا اعلان کیا ہے۔ ڈپٹی چیئرمین نیب سہیل ناصر کا کہنا ہے کہ ایسی درخواستوں پر کارروائی نہیں کی جائے گی۔
ڈپٹی چیئرمین نیب سہیل ناصر نے گورنر پنجاب سردار سلیم حیدر خان سے ملاقات کی جس میں ڈی جی نیب لاہور امجد مجید اولکھ بھی شریک ہوئے۔
لاہور میں منہاج القران کی میلاد کانفرنس سے واپسی پر پی ٹی آئی رہنما گرفتار
ڈپٹی چیئرمین نیب نے گورنر پنجاب کو احتساب سہولت سیل (اےایف سی) پر تفصیلی بریفنگ دیتے ہوئے کہا کہ کسی کے ساتھ زیادتی ہوگی نہ ہی کسی کی عزت نفس مجروح کی جائے گی۔
انہوں نے کہا کہ کسی بھی معزز ممبر صوبائی اسمبلی کے خلاف درج شکایت کو احتساب سہولت سیل میں اسکروٹنی کیلئے ریفر کیا جائے گا۔ یہ سیل صوبائی اسمبلی ممبران کے خلاف نیب کو موصول شکایات پر ابتدائی اسکروٹنی کرے گا تاہم نیب کسی بھی ایم پی اے کے خلاف موصول شکایت ڈائریکٹ ڈیل نہیں کرے گا۔ سیل ابتدائی تحقیقات کے بعد مذکورہ شکایت بذریعہ اسپیکر نیب کو واپس ارسال کرے گا۔
سہیل ناصر نے اعلان کیا کہ نیب آئندہ اراکین اسمبلی کے خلاف گمنام اور جعلی ناموں سے درج درخواستوں پر کارروائی نہیں کرے گا، غلط اور بے بنیاد درخواست پر درخواست دہندہ کے خلاف کارروائی ہوگی۔
