پنجاب کی جیلوں میں بیرکس کی مانیٹرنگ کے نظام کو بہتر بنانے کیلئے ایک اہم اقدام سامنے آگیا تمام جیلوں کی بیرکس میں کیمروں کی تنصیب کا فیصلہ کر لیا گیا جس کا مقصد قیدیوں کی نگرانی اور جیل کے ماحول کی بہتری ہے۔
آئی جی جیل خانہ جات میاں فاروق نذیر کے مطابق لاہورسمیت پنجاب بھرکی جیلوں کی بیرکس میں 45سوکےقریب کیمرے لگائےجائیں گے کیمروں کی تنصیب 3 مراحل میں مکمل کی جائے گی، پہلے مرحلے میں سنٹرل اور ہائی سیکیورٹی جیلوں میں کیمرے نصب کیے جائیں گے جبکہ ہر بیرک میں مانیٹرنگ کیلئے ایک کیمرہ نصب کیا جائے گا۔
فاروق نذیر کے مطابق اس اقدام سے بیرکس کی بہتر مانیٹرنگ ممکن ہو گی اور قیدیوں کی نقل و حرکت، بیماری کی صورت میں اسپتال منتقلی کے اوقات اور بیرکس میں سامان کی چوری کی شکایات کو کنٹرول کیا جا سکے گا۔
آئی جی جیل خانہ جات فاروق نذیر نے بتایا کہ کیمروں کی تنصیب کیلئے سمری حکومت کو ارسال کر دی گئی، سمری کی منظوری کے بعد ٹینڈرنگ کا عمل شروع کر دیا جائے گا اور عملدرآمد کا آغاز ہو جائے گا۔
