بنگلہ دیش کی عبوری حکومت کے چیف ایڈوائزر محمد یونس کی ڈھاکہ میں ’حفاظت اسلام‘ کے رہنما مامون الحق اور گروپ کے دیگر ارکان سے ملاقات کی تصاویر وائرل ہونے کے بعد بھارت سیخ پا ہوگیا ہے۔

ذرائع کے مطابق محمد یونس اور حزب اختلاف کے رہنماؤں کے درمیان ہفتہ (31 اگست) کو ہونے والی ملاقات میں انتخابی اصلاحات اور وقت پر انتخابات کرانے کی ضرورت پر زور دیا گیا۔

محمد یونس اور مامون الحق کے درمیان ہونے والی ملاقات سے بھارت کو آگ لگ گئی۔ واضح رہے کہ بھارت نواز معزول شیخ حسینہ نے اسلام پسند رہنما مامون الحق سمیت متعدد کو گرفتار کوایا تھالیکن جب سے شیخ حسینہ نے استعفیٰ دے دیا تو عبوری حکومت نے مامون الحق اور دیگر انتہا پسند رہنماؤں کو رہا کر دیا ہے۔

عبوری حکومت نے ملک کی سب سے بڑی اسلام پسند جماعت جماعت اسلامی پر سے پابندی بھی اٹھا لی۔ علاوہ ازیں عبوری حکومت نے انصار اللہ بنگلہ ٹیم (اے بی ٹی) کے سربراہ جسیم الدین رحمانی کو رہا کر دیا جس پر بھارت بہت پریشان ہے کیونکہ بھارتی حکومت انہیں دہشت گرد تصورکرتا ہے۔