بالی وُڈ اور ہالی وُڈ کی فلموں میں دکھایا جاتا ہے کہ شادی کے وقت باپ بیٹی کو یوں رخصت کرتا ہے کہ اُس کا ہاتھ دولھا کے ہاتھ میں دیتا ہے۔ اِس عمل کو بیٹی کو وداع کرنا کہتے ہیں۔ عرفِ عام میں یہ وداعی کہلاتی ہے۔ اب سوئیڈن میں اس رسم کے خلاف آواز اٹھی ہے۔
سوئیڈن میں ایک طبقے کا کہنا ہے کہ بیٹی کو وداع کرنا ہماری روایت نہیں۔ یہ ہالی وڈ کی فلموں سے ہم میں در آئی ہے اس لیے اِسے ترک کردینا بہتر ہے۔ یہ صدا سولھویں صدی عیسوی کے جرمن مصلح پروٹیسٹنٹ مارٹن لیوتھر کے پیرَوؤں کی طرف سے اٹھی ہے۔
امریکا اور برطانیہ میں شادی کے وقت دلھن اپنے دولھا کے ساتھ نہیں چلتی بلکہ اس کا باپ اُسے ساتھ لے جاکر دولھا کے حوالے کرتا ہے۔ سوئیڈن کا شمار اُن ممالک میں ہوتا ہے جہاں صنفی بنیاد پر مکمل مساوات کا تصور پایا جاتا ہے۔ اب وہاں بھی ایسے واقعات ہو رہے ہیں کہ شادی کے ساتھ باپ اپنی بیٹی کو ساتھ لے جاکر دولھا کے حوالے کرتا ہے۔
مارٹن لیوتھر کے پیرَو کہتے ہیں کہ سوئیڈن کی کبھی یہ روایت نہیں رہی اس لیے اِسے نکال باہر کرنا چاہیے۔ اُن کا کہنا ہے کہ شادی کے وقت دولھا اور دلھن کا ساتھ چلتے ہوئے گاڑی میں بیٹھنا ہی درست طریقہ ہے کیونکہ اِس میں صنفی مساوات کا تصور پایا جاتا ہے۔
