سوئیڈن میں حکام نے دو افراد پر قرآن کی بے حرمتی کی فردِ جرم عائد کردی ہے۔ حکام کا کہنا ہے کہ 2023 میں اِن دونوں نے قرآن کو ایسے طریقے سے برتا جس سے مسلمانوں کے خلاف اُن کے مذہب کی بنیاد پر نفرت کا اظہار ہوتا تھا۔
سوئیڈش حکام کے مطابق سلوان مومیکا اور سلوان نجم پر فردِ جرم عائد کی گئی ہے۔ قرآن کی بے حرمتی کے واقعات پر مسلم دنیا میں شدید احتجاج کیا گیا تھا۔
فردِ جرم کے مطابق دونوں ملزمان نے قرآن کی بے حرمتی کی اور دارالحکومت اسٹاکہوم کی ایک مسجد کے باہر مسلمانوں کو مغلظات بھی بکیں۔
دونوں ملزمان کی طرف سے قرآن کی بے حرمتی کی بہت سے لوگوں نے ویڈیوز بنائی تھیں۔ یہ پورا کیس بصری مواد پر مبنی شواہد کی بنیاد پر قائم کیا گیا ہے۔
2023 میں قرآن کی بے حرمتی کے واقعات کے باعث سوئیڈن کے تعلقات مسلم دنیا سے غیر معمولی کشیدہ ہوگئے تھے۔
سینیر پراسیکیوٹر اینا ہینکیو نے ایک بیان میں کہا کہ چار مختلف واقعات کے حوالے سے فردِ جرم عائد کی گئی ہے۔ دونوں ملزمان کے خلاف بنیادی شواہد ویڈیوز کی شکل میں ہیں۔
