بھارت کے دارالحکومت دہلی میں ایک ڈھابے کے مالک نے اپنے ملازمین کے ساتھ مل کر گاہک کو تشدد کے بعد سر پر کباب کی سیخ کے وار کرکے مار ڈالا۔
جھگڑا پارسل کے آرڈر کی تکمیل میں تاخیر پر ہوا تھا۔ جب گاہک نے شکایت کی تو ڈھابے کے ملازمین سے تو تو میں میں ہوئی۔ ملازمین نے ڈھابے کے مالکان کوبلالیا جو کئی افراد کے ساتھ آئے اور گاہک کو مارنا شروع کردیا۔
29 سالہ ہرنیت سنگھ سچدیو شدید زخمی ہوا تو اُس کے دوستوں نے اُسے اسپتال پہنچایا تاہم وہ جانبر نہ ہوسکا۔
ہرنیت کے دوستوں نے اس کا اسکوٹر ڈھابے کے باہر دیکھا تو اندر گئے جہاں اُن کے دوست کو بُری طرح مارا جارہا تھا۔
ڈھابے کے مالک کیتن نرولا اور اجے نرولا نے ملازمین کے ساتھ مل کر ہرنیت سنگھ سچدیو پر بہیمانہ تشدد کیا جس کے نتیجے میں وہ شدید زخمی ہوا۔
ہرنیت سنگھ کی ماں نے بتایا کہ اُن کی بہو امید سے ہے۔ ہرنیت سنگھ کے ہاں پہلی اولاد ہونے والی ہے۔ پولیس نے ریسٹورنٹ کے مالک اور ایک ملازم سمیت تین افراد کو حراست میں لے لیا ہے۔
