بھارت کا شمار اُن چند ممالک میں ہوتا ہے جہاں سے دنیا کو سب سے زیادہ حیرت انگیز خبریں ملتی ہیں۔ پورے ملک میں عجیب و غریب واقعات تواتر سے رونما ہوتے رہتے ہیں۔ معمولی سی بات کو اِشو میں تبدیل کرنے کا ہنر کوئی اہلِِ بھارت سے سیکھے۔
اس وقت بھارت میں بھارتیہ جنتا پارٹی کی قیادت میں قائم سیاسی اتحاد این ڈی اے کی حکومت ہے۔ بھارتیہ جنتا پارٹی یعنی بی جے پی کی ایک رہنما کے ساتھ عجیب و غریب بات ہوئی ہے۔
معروف اداکارہ اور بی جے پی کی رہنما نمیتا جب جنماشٹمی منانے کے لیے جنوبی بھارت کے معروف مندر پہنچی تو اُسے اندر جانے سے روک دیا گیا۔
نمیتا جب جنوبی بھارت کی ریاست تامل ناڈو کے شہر مدورائی میں واقع میناکشی سُندریشور مندر میں داخل ہونے لگی تو انتظامیہ نے اُسے روک دیا اور کہا کہ وہ اپنے آپ کو ہندو ثابت کرے۔ نمیتا کو سبھی جانتے ہیں مگر پھر بھی اُسے رسمی کارروائی کے نام پر خفت سے دوچار کیا گیا۔
نمیتا نے اپنا آئی ڈی کارڈ دکھایا تو مندر کی انتظامیہ کی جانب سے کہا گیا کہ وہ ماتھے پر بندیا لگائے تاکہ یہ بات کُھل کر سامنے آسکے کہ وہ ہندو ہے۔
