پاکستان تحریک انصاف (پی ٹی آئی) کے رہنما بیرسٹر علی ظفر کا کہنا ہے کہ جلسے کی منسوخی پر سوالیہ نشان اٹھ رہے ہیں، کل بانی پی ٹی آءی عمران خان سے ملاقات کرکے سچ معلوم کروں گا۔
بیرسٹر علی ظفر نے آج نیوز کے پروگرام ”نیوز انسائٹ وِد عامر ضیاء“ میں آج اسلام آباد میں جلسہ منسوخ ہونے کے حوالے سے گفتگو کی۔
بیرسٹر علی ظفر نے کہا کہ جلسے کی منسوخی پر سوالیہ نشان اٹھ رہے ہیں، جلسے کی منسوخی پر کچھ لوگ ناراض بھی ہیں۔
انہوں نے کہا کہ بانی پی ٹی آئی کی ہدایت ہے کہ قانون ہاتھ میں نہیں لینا، این او سی کی منسوخی کے بعد بھی جلسے کا فیصلہ ہوا تھا، کل رات ہی جلسہ منسوخ ہوجاتا تو ناراضی نہ ہوتی۔
سوشل میڈیا پر جلسے کی منسوخی کی وجوہات اور علیمہ خان کے اعظم سواتی والے بیان کے حوالے سے بیرسٹر علی ظفر نے کہا کہ آج صبح بانی پی ٹی آئی سے ملاقات شیڈول نہیں تھی، کل بانی پی ٹی آئی سے ملاقات کرکے سچ معلوم کروں گا۔
انہوں نے کہا کہ پرسوں بانی پی ٹی آئی نے جلسے کرنے کا کہا تھا، اس میں کوئی شک نہیں کہ جلسہ منسوخ ہونے سے کنفوژن ہوئی۔
ان کا کہنا تھا کہ ہماری جلسے کرنے کی اکثر درخواستیں مسترد ہوئیں، کچھ لوگ نہیں چاہتے کہ پی ٹی آئی جلسے کرے، موجودہ حکومت ہمارامینڈیٹ چراکربیٹھی ہوئی ہے، حکومت ہمارے جلسوں سے گھبراتی ہے۔
