اسرائیلی وزیرِخزانہ بیزائل اسموٹریچ کے اس بیان کی دنیا بھر میں شدید مذمت کی جارہی ہے جس میں اس نے کہا تھا کہ غزہ کے شہریوں کو بھوکا مارنا کسی بھی اعتبار سے کوئی غیر اخلاقی عمل نہیں۔

اسرائیلی وزیرِخزانہ کی طرف سے فلسطینیوں کو بھوکا مارنے کے بیان کی اقوام متحدہ اور عالمی رہنماؤں نے شدید مذمت کی ہے۔ اقوام متحدہ کے ہائی کمشنر برائے انسانی حقوق وولکر ٹرک کا کہنا ہے کہ جنگی مقاصد کے لیے شہریوں کو بھوک سے مارنا جرم ہے۔

ان کا کہنا تھا ہم معصوم شہریوں کے خلاف نفرت انگیز بیانات کی مذمت کرتے ہیں۔ ایسے بیانات پر قانون کے مطابق سزادی جانی چاہیے۔

فلسطینی وزارتِ خارجہ نے مطالبہ کیا ہے کہ اسرائیلی وزیرِخزانہ کے وارنٹ جاری کیے جائیں۔ آسٹریلوی وزیرِخارجہ کا کہنا ہے کہ شہریوں کو جان بوجھ کر بھوکا رکھنا جنگی جرم ہے۔ فرانسیسی وزیرِخارجہ کا کہنا ہے کہ اسرائیلی وزیرِخزانہ کا بیان کسی بھی سطح پر قابلِ قبول نہیں۔

یورپی یونین کے خارجہ پالیسی کے جوزف بورل نے بھی اسرائیلی وزیرِخزانہ کے بیان کی شدید مذمت کی ہے۔ ان کا کہنا ہے کہ اسرائیلی وزیر کا بیان انسانیت کے بنیادی اصولوں کی توہین ہے۔