بھارت کے مایہ ناز کرکٹ اسٹار سچن تینڈولکر نے کہا ہے کہ ونیش پھوگاٹ کو اُس میڈل سے دور کردیا گیا جو اُس کا حق تھا۔ سوشل میڈیا پلیٹ فارم ایکس پر ایک پوسٹ میں سچن تینڈولکر نے لکھا ہے کہ اگر ونیش پھوگاٹ کو کسی غیر قانونی سرگرمی پر مقابلے سے باہر کیا جاتا تو بات سمجھ میں آنے ولای تھی مگر محض وزن کی بنیاد پر اِتنا بڑا قدم اٹھانا درست بات نہیں۔
ایکس پر اپنی پوسٹ کے آخر میں کرکٹ اسٹار نے لکھا ہے کہ قوم نے ونیش پھوگاٹ کا احترام تو بہرحال ملحوظِ خاطر رکھا ہے۔ امید ہے کہ وہ جس شناخت کی حقدار ہے وہ اُسے مل کر رہے گی۔
تینڈولکر نے لکھا ہے کہ کھیلوں میں قواعد و ضوابط ہوتے ہیں مگر اُن پر وقفے وقفے سے نظرِثانی بھی کی جانی چاہیے۔ ونیش پھوگاٹ نے بہت محنت کی تھی اور محض وزن کے معاملے پر اُسے میڈل سے محروم کردیا گیا۔ وہ شدید جاں فشانی کا مظاہرہ کرتے ہوئے یہاں تک ٹاپ ٹو کے لیول تک آگئی تھی۔ اس مرحلے پر میڈل پر اُس کا حق تھا۔ ہمیں کورٹ آف آربیٹریشن فار اسپورٹس کے فیصلے کا انتظار کرنا چاہیے۔ امید کی جانی چاہیے کہ یہ عدالت ونیش پھوگاٹ کو اُس کا حق دے گی۔
