ٹیسلا اور اسپیس ایکس کے بانی ایلون مسک نے پیرس اولمپکس سے مشہور ہونے والے معروف ترکش شوٹر یوسف ڈیکیک کی ان دیکھی ویڈیو شئیر کردی۔
واضح رہے 51 سالہ یوسف ڈیکیک نے پیرس اولمپکس 2024 میں مکسڈ 10 میٹر ایئر پسٹل ایونٹ میں سلور میڈل حاصل کیا، ساتھ ہی ان کا شوٹنگ کا ’کول اسٹائل‘ بھی سوشل میڈیا صارفین کی خاص توجہ کا مرکز بنا۔ یوسف ڈیکیک کی خاصیت یہ ہے کہ وہ دیگر شوٹرز کی طرح سیفٹی گیجٹس کا استعمال کیے بغیر صرف جیب میں ایک ہاتھ ڈال کر نشانہ بازی کی مہارت رکھتے ہیں۔
ہٹ مین یا قدرتی شوٹر؟ اولمپکس میں جیب میں ہاتھ ڈال کر شوٹنگ کرنے والے ترک کھلاڑی کے چرچے
وہیں یوسف ڈیکیک کی مہارت کے چرچے ایلون مسک تک جا پہنچے جس کے بعد انہوں نے ترکش شوٹر کی اے آئی (آرٹیفیشل انٹیلیجنس) پر مبنی ایک ویڈیو شئیر کی جسے دیکھ کر سوشل میڈیا صارفین یہ سوچنے پر مجبور ہوئے کہ انہوں نے مقابلہ جیتنے کے بعد شراب کب پی؟
ایلون مسک نے مذکورہ ویڈیو اپنے آفیشل ایکس اکاؤنٹ پر شئیر کی جس میں دیکھا گیا کہ یوسف ڈیکیک اپنے ہدف کا نشانہ لگاتے ہیں بعد ازاں اے آئی کی مدد سے ان کی بندوق ایک بیئر (شراب کی بوتل) میں تبدیل ہوجاتی ہے جس کے بعد انہیں گھونٹ لیتے بھی دیکھا جا سکتا ہے۔
وائرل ویڈیو پر سوشل میڈیا صارفین نے مختلف تبصرے بھی کیے۔
واضح رہے سنہ 1973 میں پیدا ہونے والے یوسف ڈیکیک نے سال 2008 سے اولمپک گیمز میں باقاعدہ حصہ لینا شروع کیا تھا۔
