کراچی میں اسٹریٹ کرائمز کی وارداتوں کا گراف نیچے نہیں لایا جاسکا ہے۔ شہرِ قائد کے بیشتر علاقوں میں اسٹریٹ کرمنلز دندناتے پھر رہے ہیں۔ اسلحے کے زور پر وہ شہریون کو کہیں بھی گھیر کر لُوٹ لیتے ہیں۔
کورنگی اور سرجانی میں ڈکیتوں کی فائرنگ سے دو افراد زخمی ہوگئے۔ گلبرگ میں عوام نے تین مبینہ ڈاکوؤں کو پکڑ لیا۔ مشتعل افراد نے ڈاکوؤں کی ڈٹ کر دُھنائی کر ڈالی۔ عوام کے ہاتھوں دُھنائی سے ملزمان اَدھ مُوئے ہوگئے۔
لانڈھی میں پولیس نے خاتون سے لوٹ مار کی کوشش ناکام بنادی۔ اس واردات کو ناکام بنانے کے لیے فائرنگ کے تبادلے میں ایک ڈاکو زخمی ہوگیا۔
پولیس نے جمشید کوارٹرز کے علاقے سے رکشہ گینگ کے تین اہم کارندوں کو گرفتار کرلیا۔ پولیس کے مطابق ملزمان شہریوں کو رکشہ میں بٹھاکر لوٹا کرتے تھے۔ ملزمان نے 10 جولائی کو شہری سے 37 ہزار روپے لُوٹے تھے۔
کارروائی کےدوران پولیس نے ملزمان سے اسلحہ اور مسروقہ سامان برآمد کرلیا۔ پوچھ گچھ کی جارہی ہے۔ عوامی حلقوں نے پولیس کے اعلیٰ حکام سے مطالبہ کیا ہے کہ اسٹریٹ کرمنلز کو ناکام بنانے کے لیے جامع حکمتِ عملی کے ذریعے کام کیا جائے تاکہ شہریوں میں تحفظ کا احساس پیدا ہو اور اُنہیں سکون کا سانس لینے کا موقع ملے۔
