پی آئی اے کی ایک ایئر ہوسٹس کو سعودی عرب سے ایک لاکھ 40 ہزار ریال اسمگل کرنے کے الزام میں گرفتار کیا گیا ہے۔ جرم ثابت ہونے پر اُسے برطرف کردیا جائے گا۔
لاہور کے علامہ اقبال انٹرنیشنل ایئر پورٹ سے گرفتار کی جانے والی ایئر ہوسٹس کو میجسٹریٹ کے سامنے پیش کیا گیا ہے جس پر جوڈیشل ریمانڈ دے دیا گیا۔
برطانوی نشریاتی ادارے کو کسٹم حکام نے بتایا کہ کرنسی اسمگل کرنے کی اطلاع ملتے ہی ایئر ہوسٹس کو گرفتار کرکے ایف آئی آر درج کرلی گئی۔ ایئر ہوسٹس نے سعودی کرنسی جرابوں اور زیرِجامہ میں چھپا رکھی تھی۔
وائرل ہونے والی وڈیو میں ایئر ہوسٹس کے قبضے سے کرنسی برآمد ہوتی ہوئی دیکھی جاسکتی ہے۔ کلکٹر کسٹمز علی عباس گردیزی کے مطابق اطلاع ملی تھی کہ غیر ملکی کرنسی اسمگل کرنے کی کوشش کی جائے گی۔
شک ہونے پر ایئر ہوسٹس کی تلاشی لی گئی۔ جرم ثابت ہونے پر اُسے قید اور جرمانے کی سزا سنائی جاسکتی ہے۔ پی آئی اے نے محکمہ جاتی کارروائی کا اعلان بھی کیا ہے۔
پی آئی اے کے ترجمان عبداللہ حفیظ نے بتایا کہ حراست میں لی جانے والی ایئر ہوسٹس لاہور سے دبئی کی پرواز پی کے 203 پر تعینات تھی۔ انہوں نے بتایا کہ عملے کے ارکان بھی اُتنی رقم لے جاسکتے ہیں جتنی عام مسافر لے جاسکتے ہیں۔
یہ بھی پڑھیں :
پی آئی اے کی ایئر ہوسٹس کینیڈا جا کر لاپتہ
