تین سال کے لیے انٹرنیشنل میڈیا رائٹس اپنی مطلوب قیمت پر فروخت کرنے میں پاکستان کرکٹ بورڈ کو ناکامی کا منہ دیکھنا پڑا ہے۔ تازہ ترین بولی محفوظ و متوقع سے نصف کی حد تک پہنچ سکی ہے۔
پی سی بی نے تین سالہ معاہدے کے لیے 2 کروڑ 10 لاکھ ڈالر کی کم از کم قیمت محفوظ کی تھی۔ اتنی رقم کا حصول ممکن نہ ہوسکا۔ ایک پاکستانی میڈیا گروپ اور ایک پرائیویٹ کمپنی کے کنسورشیم کے علاوہ غیر ملکی کمپنیوں وِلو اور اسپورٹس فائیو نے بولی میں حصہ لیا۔
اسپورٹس فائیو نے بلند ترین بولی لگائی جو 78 لاکھ ڈالر تھی۔ پاکستانی کنسورشیم کی بولی 41 لاکھ ڈالر تھی جبکہ وِلو کی بولی 22 لاکھ 50 ہزار ڈالر تھی۔ جب محفوظ قیمت حاصل نہ ہوسکی تو پی سی بی نے پھر بولی لگوائی۔ اس بار پاکستانی کنسورشیم نے اپنی بولی بڑھاکر 78 کروڑ 50 لاکھ ڈالر کردی۔
پاکستان کرکٹ بورڈ نے پاکستانی کنسورشیم کی یہ بولی بھی مسترد کردی کیونکہ یہ توقعات سے بہت کم تھی۔ اس کے بعد نیوزی لینڈ کے خلاف ہوم سیریز اور ویسٹ انڈیز کے خلاف ویمین سیریز کا نیا ٹینڈر جاری کیا گیا۔
اس بولی میں پاکستانی کمپنیوں نے 99 ہزار ڈالر کی بولی لگائی جبکہ وِلو نے 75 ہزار ڈالر اور اسپورٹس فائیو نے 50 ہزار ڈالر کی بولی لگائی۔
پی سی بی نے 2024 تا 2026 کے انٹرنیشنل رائٹس کی فروخت کے لیے پھر بولی لگوائی۔ اس مدت کے دوران پاکستانی کرکٹ ٹیم 11 ٹیسٹ میچ، 26 ایک روزہ میچ اور 24 ٹی 20 میچ کھیلے گی۔ اس کوشش کے باوجود پی سی بی کی توقعات پوری نہ ہوسکیں اور اب کی بار نئی بلند ترین بولی گزشتہ بار کی مسترد کی ہوئی بلند ترین بولی سے نصف رہی۔
