برطانیہ میں ایک 20 سالہ لڑکی نے ”خدا کا قرب حاصل کرنے“ اور ”دنیا کو بچانے کیلئے“ اپنے ہاتھوں سے اپنی آنکھیں نکال لیں۔

کیلی متھارٹ نامی اس نوجوان لڑکی نے 2018 میں نشے میں دھت ہوکر اپنی آنکھیں نکال لیں کیونکہ اسے یقین تھا کہ اس سے دنیا بچ جائے گی۔

برطانوی خبر رساں ادارے ”ڈیلی اسٹار“ کے مطابق اُس سال کیلی میں بائی پولر ڈس آرڈر کی تشخیص ہوئی اور دل دہلا دینے والے بریک اپ کے بعد اسے ذہنی خرابی کا سامنا کرنا پڑا۔

اس ہنگامہ خیز وقت کے دوران، اس نے اپنے جذبات کو سکون دینے کے لیے منشیات کا رخ کیا۔

خود کو نقصان پہنچانے کے دردناک تجربے کے بارے میں بات کرتے ہوئے، اس نے کہا، ’میں فریب میں مبتلا تھی، اس لیے میری یادیں مبہم ہیں‘۔

کیلی نے کہا کہ ’مجھے یہ سوچنا یاد ہے کہ کسی کو دنیا کو درست کرنے کے لیے کسی اہم چیز کی قربانی دینی پڑے گی، اور وہ شخص میں ہوں۔ میں نے سوچا کہ سب کچھ اچانک ختم ہو جائے گا اور اگر میں نے فوراً اپنی آنکھیں نہ نکالی تو سب مر جائیں گے۔‘

اس نے دردناک تجربہ بیان کرتے ہوئے بتایا، ’میں نے اپنے انگوٹھے، شہادت کی انگلی اور درمیانی انگلی کو آنکھ میں گھسا دیا۔ میں نے ہر آنکھ کی گولی کو پکڑا، مروڑا، اور کھینچتی رہی یہاں تک کہ دونوں آنکھیں ساکٹ سے باہر نکل گئیں‘۔

کیلی نے کہا ’یہ ایک بہت بڑی جدوجہد کی طرح محسوس ہوا، سب سے مشکل چیز جو کبھی مجھے کرنی پڑی کیونکہ میں اب نہیں دیکھ سکتی تھی، مجھے نہیں معلوم کہ وہاں خون تھا‘۔

کیلی کی والدہ کیٹی ٹومپکنز اس بارے میں اپنی ایک پوسٹ میں کہا، ’مجھے اس پر بہت فخر ہے اور میں اس کے اور خدا کے لیے اس کی محبت کے لیے شکر ادا کرتی ہوں۔‘

کیلی اب 25 سال کی ہے اور نابینا افراد کے اسکول میں تعلیم حاصل کرنے کے بعد اب وہ اپنا ہائی اسکول ڈپلومہ نیورو بائیولوجی میں جانے کی خواہش کے ساتھ مکمل کر رہی ہے۔

کیلی نے کہا کہ ’چونکہ میں پہلے دیکھ سکتی تھی، اس لئے میرا دماغ نہ دیکھنے کو قبول نہیں کر رہا، جب آپ اندھے ہوتے ہیں تو یہ اندھیرا نہیں ہوتا‘۔

کیلی تین سال قبل زندگی کو یکسر بدل دینے والے عمل سے گزری تھی، اس کو ایک مصنوعی آنکھ لگائی گئی ہے جو اس کی اصلی آنکھوں سے مشابہت کے لیے ڈیزائن کی گئی تھی، جس نے اس کے خاندان اور دوستوں میں بے پناہ خوشی پیدا کی۔