دبئی: عالمی شہرت یافتہ پاکستانی گلوکار راحت فتح علی خان کی دبئی ائرپورٹ پر گرفتاری کے معاملے کی حقیقت سامنے آگئی۔
اس حوالے سے راحت فتح نے اپنے سوشل میڈیا اکاؤنٹس پر ویڈیوز بھی اپ لوڈ کی ہیں جس میں انہوں نے گرفتاری کی خبروں کی تردید کی۔
گلوکار کی جانب سے بیان سامنے آیا ہے کہ وہ گرفتار نہیں ہوئے بلکہ ایئرپورٹ پر نارمل چیکنگ اور سوال جواب کے لیے ان سے پوچھ گچھ ہوئی تھی اور اب وہ اپنا کام کررہے ہیں۔
ویڈیو میں راحت فتح علی خان کا کہنا تھا کہ ان سے سوال جواب کیلئے درخواستیں دبئی حکام کو دی گئی تھیں اور یہ کوئی بھی دے سکتا ہے۔
کچھ دیر قبل راحت فتح علی خان سے متعلق خبر سامنے آئی تھی کہ انہیں متحدہ عرب امارات کے ائیرپورٹ پر گرفتار کرلیا گیا، وہ پروگرام کے لیے دبئی میں ہیں۔
ذرائع کے مطابق راحت فتح علی خان کے سابق منیجر نے ان کے خلاف دبئی حکام کو درخواستیں دے رکھی ہیں، چند ماہ قبل گلوکار نے منیجر کو تنازع کے بعد فارغ کردیا تھا۔
میڈیا رپورٹ کے مطابق راحت فتح علی خان اور سابق پروموٹر سلمان نے ایک دوسرے کے خلاف مقدمات بھی دائر کر رکھے ہیں۔
