امریکی کانگریس میں پاکستان کاکس کی چیئرپرسن شیلا جیکسن لی چل بسیں۔

74 سالہ شیلا جیکسن کینسر میں مبتلا تھیں۔ شیلا جیکسن کو حکومتِ پاکستان نے 2022 میں ہلالِ پاکستان کے اعزاز سے نوازا تھا۔

امریکی میڈیا کے مطابق شیلا جیکسن میں لبلبے کے کینسر کی تشخیص ہوئی تھی۔ امریکی ریاست ٹیکساس کے شہر ہیوسٹن سے تعلق رکھنے والی شیلا جیکسن کا شمار سب سے طویل مدت تک کانگریس کی رکن رہنے والی ڈیموکریٹس میں ہوتا ہے۔

شیلا جیکسن نے 1994میں سیاسی کریئر کا آغاز کیا اور پہلے ہی پرائمری الیکشن میں چار بار فاتح رہنے والے ڈیموکریٹ کریگ واشنگٹن کو شکست دی۔

حکومتِ پاکستان نے پاکستان اور اہلِ پاکستان کے لیے شاندار خدمات پر شیلا جیکسن کو ستمبر 2022 میں ہلالِ پاکستان کا اعزاز دیا۔

شیلا جیکسن اجتماعات میں بھرپور جوش و خروش کے ساتھ حصہ لیتی تھیں۔ وہ ہیوسٹن میں اپنے حلقے کے لیے وفاقی فنڈز کے لیے بھرپور جدوجہد کرنے کے حوالے سے بھی معروف تھیں۔

شیلا جیکسن نے 2009 میں شہر میں روشنیوں کا نظام بہتر بنانے کے لیے حکومت سے ایک ارب ڈالر کی گرانٹ منظور کروائی تھی۔