پولیس کے تربیت یافتہ کتے نے ایک خاتون کی جان بچالی اور قاتل کو گرفتار کرادیا۔ یہ واقعہ بھارت کی جنوبی ریاست کرناٹک کا ہے۔ ٹُنگا ٹو نامی کتے نے طوفانی بارش کے دوران کم و بیش آٹھ کلومیٹر کا فاصلہ دوڑتے ہوئے طے کیا اور پولیس کو ایک شخص کے قاتل تک پہنچادیا۔
تعلقہ سانتھبینور میں پولیس کو دو دن قبل ایک لاش ملی تھی۔ یہ لاش 33 سالہ سنتوش کی تھی۔ ایس پی اُوما نے پولیس کے تربیت یافتہ کتے، اُس کے ہینڈلر شفیع اور چار پولیس اہلکاروں کی ڈیوٹی لگائی کہ کسی بھی طور قاتل کو ڈھونڈ نکالیں۔
ٹُنگا ٹو کو سنتوش کے کپڑے اور جوتے سُنگھائے گئے۔ ساری چیزیں سُونگھنے کے بعد کتے نے سمعت کا تعین کرکے دوڑنا شروع کیا۔ آٹھ کلومیٹر دوڑنے کے بعد ایک مکان کے سامنے کتا رک گیا۔
مکان سے چیخنے چلانے کی آوازیں آرہی تھیں۔ جب پولیس نے مکان کا دروازہ کُھلوایا تو دیکھا کہ ایک شخص کسی عورت پر بُری طرح تشدد کر رہا ہے۔ یہ شخص رنگا سوامی تھا اور اپنی بیوی روپا سے مار پیٹ کر رہا تھا۔
رنگا سوامی کو شک تھا کہ اس کی بیوی کے سنتوش سے ناجائز تعلقات ہیں۔ پہلے اُس نے سنتوش کو قتل کیا اور اب بیوی کو بھی قتل کرنے کے درپے تھا۔ کتے کی مدد سے بیوی کے بروقت پہنچنے پر روپا کی جان بچ گئی اور سنتوش کا قاتل رنگا سوامی بھی پولیس کے ہاتھ لگ گیا۔ کرناٹک پولیس نے ٹُنگا ٹو کے لیے خصوصی انعام اور سند کا اعلان کیا ہے۔
