یوروکپ میں شاندار کارکردگی کا مظاہرہ کرنے پر فیفا نے سب سے الگ انداز اپناتے ہوئے ہسپانوی فٹبالر لامین یمال کی تعریف کر ڈالی ۔
گزشتہ روز جرمنی کے شہر برلن میں اسپین اور انگلینڈ کے درمیان یوروکپ کا فائنل کھیلا گیا جس میں اسپین کی ٹیم فاتح رہی اور اس فتح کے ساتھ ہی اسپین سب سے زیادہ 4 مرتبہ یورو کپ جیتنے والی ٹیم بن گئی۔
اس ٹورنامنٹ میں اسپین کے فٹبالر لامین یمال نے دنیا کے سامنے خود کو منوایا اور انہیں یوروکپ 2024 کا ’ینگ پلیئر آف دی ٹورنامنٹ‘ کا ایوارڈ دیا گیا۔
یوروکپ کے دوران لامین یمال کی شاندار کارکردگی پر فیفا نے اردو میں ان کی تعریف کی، فیفا کے آفیشل فیس بک پیج پر لامین یمال کی تصویر پوسٹ کی گئی جس کے کیپشن میں لکھا تھا کہ ’کمال ہے، یمال ہے‘ ۔
خیال رہے کہ لامین یمال نے یوروکپ 2024 کے فائنل سے ایک روز قبل ہی اپنی 17ویں سالگرہ منائی تھی اور وہ کوئی بھی یوروکپ فائنل کھیلنے والے کم عمر ترین کھلاڑی ہیں۔ جبکہ گزشتہ دنوں سوشل میڈیا پر فیفا نے عالمی شہرت یافتہ فٹبالر لیونل میسی کی سالگرہ کے موقع بھی پر پاکستانی گلوکار عارف لوہار کے گانے کا استعمال کیا تھا۔
