بھارت کے ساتھ ساتھ نیپال میں بھی مون سون کی موسلا دھار بارشوں اور لینڈ سلائیڈنگ نے تباہی مچادی ہے۔ جمعہ کی صبح لینڈ سلائیڈنگ کے باعث دو بسیں دریائے ترشولی میں جا گریں۔

دریائے ترشولی میں گرنے والی دونوں بسوں میں مجموعی طور پر 65 افراد سوار تھے۔ ریسکیو آپریشن جاری ہے۔ ہلاکتوں کی حتمی تعداد معلوم نہیں ہوسکی ہے۔ حکومت بھی اس حادثے کے حوالے واضح طور پر کچھ بتانے سے گریز کر رہی ہے۔

لینڈ سلائیڈنگ کے دیگر واقعات میں 10 افراد ہلاک ہوئے۔ نیپال کے بہت سے علاقے زیرآب ہیں۔ فصلوں کو بھی شدید نقصان پہنچا ہے۔ آمد و رفت کے حوالے سے دشواریوں کے باعث ملک کے بہت سے حصوں میں صنعتی و تجارتی سرگرمیاں ماند پڑگئی ہیں۔ بعض علاقوں میں تعلیمی ادارے بھی بند کردیے گئے ہیں۔