زیادہ ٹی وی دیکھنے پر باپ نے سزا کے طور پر بیٹی کو اپنے آنسوؤں سے پیالہ بھرنے کا حکم دیا تو سوشل میڈیا پر ہنگامہ مچ گیا۔
غیر ملکی میڈیا رپورٹ کے مطابق جنوبی چین کے گوانگشی ژوانگ علاقے میں یولن سے تعلق رکھنے والا شخص جب رات کا کھانا کھا رہا تھا تو اس نے اپنی بیٹی جیا جیا کو کھانے کی میز پر بلایا۔ تاہم، جب بیٹی نے والد کی بات پر دھیان نہیں دیا تو باپ نے غصے میں آکر ٹی وی بند کیا اور بیٹی کو سزا دی۔
باپ نے ایک بڑا خالی پیالہ بیٹی کو دیا اور کہا جب یہ پیالہ آپ کے انسوؤں سے بھر جائے گا تب آپ کو ٹی وی دیکھنے کی اجازت ملے گی۔
10 سیکنڈ گزرنے کے بعد جیا جیا نامی بچی نے والد سے کہا وہ ہاتھ میں پیالہ تھامے تھک چکی ہے اور اس کے لیے سنبھالنا مشکل ہو رہا ہے۔
بعد ازاں والد کو اپنی بیٹی کو یوں اس طرح روتا دیکھ کر رحم آگیا اور انہوں نے مسکراتے ہوئے پیالہ واپس لے لیا۔
میڈیا رپورٹ کے مطابق بیٹی کی والدہ سزا کی ویڈیو شوٹ کر رہی تھی جس کے بعد انہوں نے سوشل میڈیا پر اپ لوڈ کی جو دیکھتے ہی دیکھتے وائرل ہوگئی۔ سوشل میڈیا صارفین ننھی بیٹی کے والد کو ایک ’سفاک شخص‘ قرار دے رہے ہیں۔
مذکورہ ویڈیو گزشتہ ماہ کی ہے لیکن اب تک سوشل میڈیا پر کافی وائرل ہے۔
