آزاد کشمیر کی ڈسٹرکٹ جیل پونچھ سے فرار سزائے موت کا قیدی عامر دوبارہ گرفتار کرلیا گیا، اٹھارہ مفرور قیدیوں میں سے گرفتار قیدیوں کی تعداد سات ہوگئی۔

وزیر اطلاعات آزاد کشمیر پیر مظہر سعید نے میڈیا کو بتایا کہ ڈسٹرکٹ جیل پونچھ سے فرار ہونے والے قیدیوں کی گرفتاری کے حوالے پولیس کو بڑی کامیابی حاصل ہوئی ہے۔ سزائے موت کے قیدی عامر عبداللہ کو دوبارہ گرفتار کرلیا گیا ہے۔

ان کا کہنا تھا کہ حکومت آزاد کشمیر نے عامر عبداللہ کی گرفتاری کیلئے ایک کروڑ کا انعام مقرر کر رکھا تھا۔

راولاکوٹ: مفرور قیدیوں کی اطلاع دینے والوں کیلئے کروڑوں روپے انعامات کا اعلان

انھوں نے مزید بتایا کہ چند روز قبل پونچھ جیل راولاکوٹ توڑ کر فرار ہو نے والے 18 قیدیوں میں سے 7 کو دوبارہ گرفتارکرلیا ہے، 11 مفرور قیدیوں کی تلاش اور گرفتاری کیلئے آپریشن جاری ہے، آئندہ چند روز میں مزید گرفتاریوں کی امید ہے۔

واضح رہے 30 جون کو راولاکوٹ جیل سے بھارت کو مطلوب شخص سمیت درجن بھر سے زائد قیدی فرار ہوگئے تھے۔