بھارتی ریاست اترپردیش کے ضلع ہاتھرس کے گاؤں میں ایک مذہبی تقریب کے دوران بھگدڑ مچنے سے 121 افراد ہلاک ہوگئے جبکہ درجنوں زخمی ہوگئے۔
مذکورہ واقعہ بروز منگل کو انڈیا کی دارالحکومت نئی دہلی سے تقریباً 200 کلومیٹر (125 میل) جنوب مشرق میں ضلع ہاتھرس کے ایک گاؤں میں پیش آیا۔
بھارتی میڈیا کے مطابق اترپردیش میں مذہبی رسوم ادا کرنے کے لیے ہزاروں افراد دریائے گنگا کے کنارے موجود تھے کہ اچانک بھگدڑ مچ گئی۔
اس حادثے میں ہلاک ہونے والوں کی لاشوں اور زخمیوں کو قریبی اسپتال منتقل کردیا گیا ہے، زخمیوں کی حالت تشویشناک ہونے کے باعث ہلاکتوں میں اضافے کا خدشہ ہے۔ پولیس کے مطابق ہلاک ہونے والوں میں خواتین کی تعداد زیادہ ہے۔
الجزیرہ کی رپورٹ کے مطابق پولیس اہلکار نے میڈیا کو بتایا کہ حادثے میں کم از کم 60 افراد کی لاشیں مردہ خانے پہنچ چکی ہیں۔
ضلعی پولیس کے ترجمان منیش چکارا نے خبر رساں ادارے روئٹرز کو فون پر بتایا کہ ”اس بات کا امکان ہے کہ ہلاکتوں کی تعداد میں اضافہ ہوسکتا ہے۔“
