پنجاب کے عوام کو دفاتر کے چکر کاٹنے کے بجائے گھر بیٹھے دستک پروگرام کی تمام سروسز میسر ہوں گی۔ وزیر اعلیٰ پنجاب مریم نواز نے کہا ہے کہ دستک پروگرام سے نہ صرف سروسز گھر بیٹھے ملیں گی بلکہ کرپشن اور استحصال کا خاتمہ ہوگا۔
مریم نواز کی خصوصی ہدایت پر دستک نمائندوں کی رجسٹریشن بھی شروع ہوگئی ہے۔ لاکھوں نوجوان نمائندے مریم کی دستک پروگرام میں سہولت کار کی خدمات سرانجام دیں گے۔ دستک سروسز کی فراہمی سے نوجوان با عزت طریقے سے روزانہ ہزاروں روپے کما سکیں گے۔
وزیر اعلیٰ کا کہنا ہے کہ مریم کی دستک پروگرام کی سروسز دس سے بتدریج بڑھا کر 65 تک کرنے پر کام شروع ہو چکا ہے۔ اس پروگرام کا دائرہ کار بتدریج تمام اضلاع تک بڑھائیں گے۔ عوام کو دفاتر کے چکر کاٹنے کے بجائے گھر بیٹھے بٹھائے تمام سروسز میسر ہوں گی۔
ان کا کہنا تھا کہ پنجاب ڈیجیٹائزیشن کےانقلابی دور میں داخل ہو چکا ہے، مزید مثبت اور نہایت مفید تبدیلیاں لائیں گے۔ انفارمیشن ٹیکنالوجی اور آرٹیفیشل انٹیلیجنس سے عوام کی زندگیوں میں بھر پور آسانیاں لارے ہیں۔
پارلیمانی نظامِ حکومت کے عالمی دن پر اپنے پیغام میں وزیراعلیٰ پنجاب مریم نواز کا کہنا تھا کہ آج پارلیمانی جمہوریت کے اصولوں کو برقرار رکھنے کے عزم کی تجدید کا دن ہے، پارلیمانی نظام شفافیت، جوابدہی اور حکمرانی میں عوام کی نمائندگی کو یقینی بناتا ہے۔
مریم نواز نے کہا کہ ہر شخص اور ادارہ پارلیمانی اداروں کو مضبوط بنانے کی کوشش میں اپنا کردار ادا کرے، قومی اور صوبائی ایوانوں کے ارکان کو خراج تحسین پیش کرتی ہوں۔
ان کا مزید کہنا تھا کہ جمہوریت اور انصاف کی اقدار کو برقرار رکھنے کی کاوشیں کرنے والے پارلیمنٹیرینز قابل تحسین ہیں، انسانی حقوق کے تحفظ کے لیے مضبوط پارلیمنٹ انتہائی ضروری ہے، پارلیمانی جمہوریت شہریوں کی فعال شرکت سے فروغ پاتی ہے۔
وزیراعلیٰ پنجاب نے یہ بھی کہا کہ جمہوریت کی قوت پارلیمانی اداروں کی مضبوطی میں ہے، پنجاب اسمبلی میں پارلیمنٹری ڈویلپمنٹ یونٹ اور ریسرچ سنٹر قائم کیا گیا ہے، پارلیمانی ڈویلپمنٹ یونٹ جمہوری اصولوں کے مطابق ارکان اسمبلی کی معاونت کرے گا۔
