نئی دہلی کے اندرا گاندھی انٹرنیشنل ایئر پورٹ پر ٹرمینل کی چھت گرنے سے ایک شخص ہلاک اور 8 زخمی ہوگئے۔ انڈیا ٹوڈے کی رپورٹ کے مطابق یہ واقعہ جمعہ کو علی الصباح دہلی میں موسلا دھار بارش کے دوران رونما ہوا۔
بھارتی اخبار کے مطابق زخمیوں کو قریبی اسپتال منتقل کردیا گیا تاہم ایک شخص ملبے میں دبا ہوا ہے۔ ریسکیو کی ٹیم اسے نکالنے کی کوشش کر رہی ہے۔ معلوم ہوا ہے کہ وہ شدید زخمی ہے۔
دہلی فائر سروس کے ترجمان نے بتایا ک موسلا دھار بارش کے دوران ٹرمینل ون کی چھت کا ایک بڑا حصہ ٹوٹ کر گرگیا۔ اس وقت وہاں درجنوں افراد موجود ہے۔
چھت گرتے ہی چیک اِن کاؤنٹر بند کرکے امدادی کارروائی شروع کردی گئی۔ اس حادثے کے باعث متعدد پروازیں بھی غیر معمولی تاخیر کا شکار ہوئیں۔
دہلی مختلف علاقوں میں جمعرات کو شروع ہونے والی موسلا دھار بارش دن بھر جاری رہی اور 24 گھنٹوں کے دوران یعنی جمعہ کی صبح ساڑھے پانچ بجے تک 228 ملی میٹر بارش ریکارڈ کی گئی جو جون کے حوالے سے ریکارڈ ہے۔ بہت سے علاقے زیرِ آب آگئے ہیں۔ بہت سے تجارتی اور صنعتی مراکز بند کردیے گئے ہیں۔ دہلی کے متعدد علاقوں میں گاڑیاں پانی میں ڈوبی ہوئی ہیں۔
