کراچی کے مختلف علاقوں میں 6 مبینہ پولیس مقابلوں میں ایک ڈاکو ہلاک ہوگیا جبکہ 9 زخمیوں سمیت 10 ڈاکو گرفتار کرلیے گئے۔

پولیس کا کہنا ہے کہ پاک کالونی کے ایم سی کٹ کے نزدیک مبینہ پولیس مقابلے میں ایک ڈاکو ہلاک ہوگیا۔

میوہ شاہ قبرستان کے علاقے میں خفیہ معلومات کی بنیاد پر کی جانے والی کارروائی کے دوران لیاری کے دو مسلح گینگسٹرز سے مقابلہ ہوا۔ فائرنگ کے تبادلے کے بعد زخمی ہونے والے دونوں ملزم جہاں زیب اور اورنگ زیب گرفتار کرلیے گئے۔

دونوں گرفتار ملزم سگے بھائی ہیں حاجی ریاست اور حاجی عابد کے لیے کام کرتے ہیں۔ دونوں اسٹریٹ کرائمز، بھتہ خوری، زمینوں پر قبضہ اور دیگر سنگین جرائم میں ملوث پائے گئے ہیں۔

گارڈن، بلدیہ، سہراب گوٹھ اور فشریز کے علاقوں میں مبینہ پولیس مقابلوں میں زخمی ہونے والے سات ڈاکو گرفتار کرلیے گئے۔ ان کے قبضے سے اسلحہ، موٹر سائیکلیں اور موبائل فون برآمد کرلیے گئے۔