وزیراعلیٰ سندھ مراد علی شاہ نے اسمارٹ سرویلنس منصوبے کا افتتاح کر دیا اور کہا کہ جرائم ختم نہیں ہوئے لیکن کرمنلز کو محدود کردیا، جرائم کی روک تھام کے لیے نیا نظام اہم کردارادا کرے گا۔
کراچی میں ایک تقریب سے خطاب کرتے ہوئے وزیراعلیٰ سندھ مرادعلی شاہ نے کہا کہ آج کی اس تقریب میں بحیثیت مہمان خصوصی شرکت میرے لیے باعث فخر ہے، سندھ کے 40 ٹول پلازہ پر نگرانی کا جدید نظام نصب کیا گیا، جرائم کی روک تھام کے لیے نیا نظام اہم کردار ادا کرے گا، 400 جدید کیمروں کی مدد سے سڑکوں کی نگرانی ہوگی، منصوبے کا نام سندھ اسمارٹ سرویلنس رکھا گیا ہے، نئے نظام سے جرائم پیشہ عناصر کی بیخ کنی ہوگی۔
اسٹریٹ کرائم کیسز ایک تہائی تک کم ہوگئے، آئی جی سندھ کی وزیراعلیٰ کو رپورٹ
وزیراعلیٰ سندھ نے کہا کہ امن وامان برقرار رکھنا ہماری ترجیح ہے، سندھ کےعوام کی حفاظت کے لیے ہرممکن اقدامات کررہے ہیں، اب صوبے، شہر کے لوگ خود کو محفوظ محسوس کریں گے۔
مراد علی شاہ کا کہنا تھا کہ ہم بہت مشکل وقت سے گزرے ہیں، 2007 میں ہماری کوئی ہائی وے محفوظ نہیں تھی، سکھر سے نوڈیرو جانے کے لیے پولیس یا ملٹری اسکواڈ کا انتظار کرنا پڑتا تھا، ایسا نہیں کہ کرائم ختم ہوگیا ہے، کرائم اب بھی ہے۔
انہوں نے مزید کہا کہ آج کرمنلز نے پولیس چوکی پر حملہ کیا، 3 جوان زخمی ہوئے، ہم کرمنلز کو جلد سزا دیں گے، گھوٹکی میں 5 جوانوں کو شہید کیا گیا، 2 ڈاکو جہنم رسید کیے۔
