وزیراعظم شہباز شریف نے سیاسی رہنماؤں سے ٹیلی فونک رابطہ کرکے انہیں عیدالاضحیٰ کی مبارکباد دی اور نیک خواہشات کا اظہار کیا، وزیراعظم نے کہا کہ پاکستان کی بہتری کے لیے مل کر کام کرنے کے عزم کا اعادہ کرتے ہیں، امید ہے حکومت میں شامل تمام اتحادی جماعتیں ملکی ترقی میں اپنا کردار ادا کرتی رہیں گی، دن رات محنت سے پاکستان کو دنیا میں اس کا کھویا ہوا مقام دلائیں گے، نئے مالی سال کے بجٹ میں عوام کو ریلیف دینے کے حوالے سے ہر ممکن اقدامات اٹھائے گئے۔
وزیرِ اعظم محمد شہباز شریف کا صدر مملکت آصف علی زرداری سے ٹیلی فونک رابطہ ہوا، دونوں رہنماؤں نے ایک دوسرے کو عید الاضحیٰ کی مبارکباد دی اور نیک خواہشات کا تبادلہ کیا۔
اس کے علاوہ ٹیلی فونک رابطے میں ملک کی مجموعی اور سیاسی صورت حال پر بھی بات چیت کی گئی۔
عید الاضحیٰ کے موقع پر دونوں رہنماؤں نے پاکستان کی بہتری کے لیے مل کام کرنے کے عزم کا اعادہ کیا۔
وزیراعظم شہبازشریف نے پاکستان پیپلزپارٹی کے چیئرمین بلاول بھٹو زرداری کو ٹیلی فون کیا اورعید کی مبارک باد دی۔
وزیراعظم نے بلاول بھٹو زرداری کو عید کے بعد وزیراعظم ہاؤس میں ملاقات کی دعوت بھی دی۔
وزیراعظم شہباز شریف نے جمعیت علماء اسلام (ف) کے سربراہ مولانا فضل الرحمان سے ٹیلی فون پر رابطہ کیا، انہیں عید الاضحیٰ کی مبارکباد دی اور نیک خواہشات کا اظہار کیا۔
وزیرِ اعظم شہباز شریف نے گورنر پنجاب سلیم حیدر، گورنر سندھ کامران ٹیسوری، گورنرخیبر پختونخوا فیصل کریم کنڈی اور گورنر بلوچستان جعفر خان مندوخیل سے ٹیلی فونک رابطہ کیا اور چاروں گورنرز کو عید الاضحیٰ کی مبارکباد اور نیک خواہشات کا تبادلہ کیا۔
وزیراعظم نے صدر آزاد جموں و کشمیر سلطان محمود چوہدری اور وزیراعظم آزاد جموں و کشمیر چوہدری انوار الحق سے بھی ٹیلی فون پر گفتگو کی، انہیں عید کی مبارکباد دی اور نیک خواہشات کا اظہار کیا۔
وزیراعظم نے وزیر اعلیٰ پنجاب مریم نواز، وزیراعلیٰ سندھ مرادعلی شاہ ، وزیراعلیٰ گلگت بلتستان گلبر خان سے بھی ٹیلی فونک رابطہ کیا، شہباز شریف نے عید الاضحیٰ کی مبارکباد کا تبادلہ اور نیک خواہشات کا اظہار کیا۔
شہباز شریف نے عید الاضحیٰ کے موقع پر قومی اتحاد و یگانگت کے عزم کا اعادہ کیا۔
وزیراعظم شہباز شریف نے مسلم لیگ (ق) کے سربراہ چوہدری شجاعت حسین اور ایم کیو ایم پاکستان کے کنوینئر خالد مقبول صدیقی سے بھی ٹیلی فونک رابطہ ہوا، جس میں انہوں نے دونوں رہنماؤں کو عید الاضحیٰ کی مبارکباد دی۔
اس کے علاوہ وزیراعظم شہباز شریف نے عبد العلیم خان، سردار خالد مگسی، سردار اختر مینگل اور آفتاب شیرپاؤ سے بھی ٹیلی فون پر بات چیت کی اور انہیں عید کی مبارکباد دی اور نیک خواہشات کا اظہار کیا۔
وزیراعظم اور ملائیشین ہم منصب کا غزہ میں مستقل جنگ بندی کوششیں تیز کرنے پر اتفاق
وزیراعظم نے سیاسی رہنماؤں سے کہا کہ عید کے اس پر مسرت و بابرکت موقع پر پاکستان کی بہتری کے لیے مل کر کام کرنے کے عزم کا اعادہ کرتے ہیں، امید ہے پاکستان کے معاشی استحکام کے لیے اتحادی حکومت میں شامل تمام جماعتیں اپنا اپنا کردار ادا کرتی رہیں گی۔
شہباز شریف نے اتحادی رہنماؤں سے ٹیلی فونک گفتگو میں کہا کہ دن رات محنت سے پاکستان کو دنیا میں اس کا کھویا ہوا مقام دلائیں گے۔
انہوں نے مزید کہا کہ نئے مالی سال کے بجٹ میں عوام کو ریلیف دینے کے حوالے سے ہر ممکن اقدامات اٹھائے گئے۔
سیاسی رہنماؤں نے بھی وزیراعظم شہباز شریف کو عید الاضحیٰ کی مبارکباد پیش کی، نیک خواہشات کا اظہار کیا اور اتحادی حکومت کے ساتھ تعاون جاری رکھنے کا عزم کا اظہار کیا۔
