شیخو پورہ کے بے نظیر انکم سپورٹ پروگرام سینٹر میں دھکم پیل کے دوران ایک خاتون بے ہوش ہوگئی۔
آج نیوز کے نمائندے سید معظم علی رضوی کے مطابق بے نظیر انکم سپورٹ پروگرام کے سینٹر پر لمبی قطار لگی ہوئی تھی اور خواتین شدید پریشانی کی حالت میں تھیں۔
بے نظیرانکم سپورٹ پروگرام کے عملے کی مبینہ کرپشن کے باعث ٹوکن بھی وصولی کے عوض جاری کیے جارہے تھے۔ ریٹ مقرر تھے۔ مستحق خواتین طویل قطاروں میں کھڑی رہ گئیں۔
بے نظیر انکم سپورٹ پروگرام کا عملہ مبینہ طور پر مک مکا کرنے والی خواتین کو پروٹوکول دینے میں مصروف تھا۔ بھیڑ کے باعث دھکم پیل ہوئی۔ متعدد خواتین دھکے کھاکر گر پڑیں۔ ایک خاتون بے ہوش ہوگئی۔
دیر سے قطار بند خواتین بے نظیر انکم سپورٹ پروگرام کے عملے کے ناروا سلوک پر پھٹ پڑیں۔ متاثرہ خواتین نے بتایا کہ وہ تین دن سے بھوکی پیاسی سینٹر آرہی ہیں مگر ٹوکن نہیں دیا جارہا۔ عملہ خواتین سے ہتک آمیز سلوک روا رکھتا ہے، بدتمیزی کرتا ہے۔ ان کا کہنا تھا کہ سفارشی لوگوں کو عملہ خود رقم فراہم کر رہا ہے۔
