حکومت کی جانب سے وفاقی بجٹ 12 جون کو قومی اسمبلی میں پیش کیا جائے گا اور امکان ہے کہ سولر پینل پر اضافی ٹیکس عائد کیا جائے گا لیکن سوشل میڈیا پر خبریں زیر گردش ہیں کہ بجٹ سے پہلے ہی سولر کی قیمتوں میں 8 سے 10 روپے فی واٹ اضافہ ہوگیا ہے۔

بجٹ کی گہما گہمی کے ساتھ ہی خبریں گردش کررہی ہیں کہ سولر پینل کی قیمت 42 روپے فی واٹ سے 50 یا 52 روپے ہوگئی ہے۔ یہ بھی بات کی جارہی ہے کہ شہروں اور دکانوں کے لحاظ سے ان میں 10 سے زائد روپے کا اضافہ ہوا ہے۔ جس کے بعد اس کی قیمت 50 سے 55 روپے فی واٹ ہوگئی ہے۔

اس حوالے سے سولر پینل کے تاجروں سے بات ہوئی تو انہوں نے بتایا کہ گزشتہ ماہ 39 روپے فی واٹ قیمت کی تھی اور گزشتہ کے اواخر اور رواں ماہ کے آغاز میں محض 2 سے 3 روپے فی واٹ اضافہ ہوا تھا۔

انہوں نے بتایا کہ اس معمولی اضافے سے فی واٹ قیمت 41 سے 42 روپے ہوگئی لیکن بجٹ کے آنے سے قبل ہی بعض نشریاتی اداروں نے خبریں چلائیں کہ بجٹ سے قبل ہی فی واٹ کی قیمت میں 8 روپے اضافہ ہوگیا ہے۔

سولر پینل کے ایک اور تاجر عثمان علی نے بتایا کہ مارکیٹ میں طلب سے زیادہ سولر پینل موجود ہیں اس لیے قویٰ امکان ہے کہ سولر پینل کی قیمت میں کمی ہوجائے کیونکہ بجٹ سے قبل تاجروں کی خواہش ہے کہ وہ زیادہ سے زیادہ سولر پینل فروخت کردیں تاکہ بجٹ کے نتیجے میں قیمت پرپڑنے والے فرق سے نقصان کم ہو۔