بالکونی سے کتے کے تین بچوں کو پھینکنے کی ویڈیو منظر عام پر آنے کے بعد شوبز انڈسٹری کی معروف اداکارہ اشنا شاہ نے واقعہ پر شدید ردعمل کا اظہار کیا اور ان افراد کی نشاندہی پر ایک لاکھ روپے انعامی رقم دینے کا اعلان کیا ہے۔
خیال رہے سوشل میڈیا پر اشنا شاہ جانوروں سے بہت محبت اور ان کے تحفظ کے لیے اکثر سرگرم بھی نظرآتی ہیں۔
مگر حال ہی میں پیش آنے واقعے کے بعد اداکارہ نے افسوس کا اظہار کیا ہے۔ مقامی این جی او کی جانب سے ایک ویڈیو پوسٹ کی گئی جس کے بعد اشنا شاہ نے کہا کہ تین مشتبہ افراد نے کتے کے بچوں کو بالکونی سے نیچے پھینکا۔
عائشہ چندریگر فاؤنڈیشن نامی اینیمل شیلٹر (جانوروں کی پناہ گا) کی جانب سے اس معاملے کو اٹھانے کے بعد تینوں افراد کی ویڈیو وائرل ہوئی تھی۔
اشنا شاہ نے اس واقعے پر سوشل میڈیا ایکس اکاؤنٹ پر ایک پوسٹ میں کہا کہ ان افراد نے کتے کے معصوم بچوں کو بالکونی سے نیچے اپنی خوشی سے تو پھینک دیا مگر یہ عمل ایک سیریل کلر جیسا ہے۔
اداکارہ نے ایکس پر اپنی پوسٹ میں کہا کہ اُن تینوں افراد کے سر میں ایک لاکھ رقم کا انعام رکھتی ہوں جو انہیں ڈھونڈنے میں میری مدد کریں گے۔
اگر کوئی وکیل اس مقدمے کو بہتر طور پر اٹھانا چاہتا ہے اور ان افراد کو جیل کی سلاخوں کے پیچھے رکھنے میں مدد کرنا چاہتا ہے تو وہ مجھ سے رابطہ کرسکتے ہیں۔
کتے کے معصوم بچوں کے قاتلوں کی شناخت اسد اور طلعت کے نام سے ہوئی ہے جنہیں پولیس کی جانب سے انہیں تاحال گرفتار نہیں کیا جا سکا۔ جبکہ تیسرے ملزم قاسم کو گرفتار کرلیا گیا ہے۔ قاسم کے بارے میں بتایا گیا کہ اسے اسد کی جانب سے کتوں کو بالکونی سے نیچے پھینکنے کا حکم دیا گیا تھا۔
