حالیہ عام انتخابات میں بھارتیہ جنتا پارٹی کی سربراہی میں قائم اتحاد کی فتح پر دنیا بھر سے مبارک باد کے پیغامات کا تانتا بندھا ہوا ہے مگر پاکستان نے اب تک نریندر مودی کو مبارک نہیں دی۔ اس پر بھارتی میڈیا کو بھی پریشانی سی لاحق دکھائی دیتی ہے۔
معروف بھارتی جریدے انڈیا ٹوڈے کی ویب سائٹ نے سوال اٹھایا ہے کہ پاکستان کی طرف سے نریندر مودی کو اب تک مبارک باد کیوں نہیں دی گئی۔
پاکستان کی طرف سے کہا گیا ہے کہ مودی کو مبارک باد دنیا ابھی قبل از وقت ہے کیونکہ معاملہ ابھی ”ناپختہ“ ہے۔
ساتھ ہی ساتھ پاکستان نے، جیسا کہ انڈیا ٹوڈے نے لکھا ہے، دوطرفہ تعلقات کو معمول پر لانے کی ضرورت پر زور دیا ہے تاکہ خطے میں کشیدگی ختم ہو۔ اس سلسلے میں پاکستانی دفترِ خارجہ کی ترجمان ممتاز زہرا بلوچ کے ریمارکس کا حوالہ بھی دیا گیا ہے۔
پاکستان اور بھارت کے تعلقات کی بحالی کے حوالے سے مذاکرات کو 2019 میں اس وقت جھٹکا لگا جب بھارت نے مقبوضہ کشمیر کی خصوصی آئینی حیثیت ختم کرکے اُسے اپنا حصہ بنالیا۔ 5 اگست 2019 کے اس اقدام کے جواب میں پاکستان نے بات چیت روک دی۔ تب سے اب تک دوطرفہ معاملات سردمہری کا شکار رہے ہیں۔
نریندر مودی کی قیادت میں بی جے پی نے اپنے اتحادیوں کے ساتھ عام انتخابات میں لوکھ سبھا کی 293 نشستیں حاصل کی ہیں۔ نریندر مودی ممکنہ طور پر اتوار کو مسلسل تیسری بار وزیرِ اعظم منتخب ہوجائیں گے۔
