سوات میں جانوروں سے انتہائی سفاکانہ سلوک روا رکھے جانے کا انکشاف ہوا ہے۔ سوات کے علاقے بحرین میں ضلعی انتظامیہ کے اہلکار اس واقعے میں ملوث ہیں۔

ایک ویڈیو میں دیکھا جاسکتا ہے کہ بحرین کی انتظامیہ کے اہلکار زندہ جانوروں کو گاڑی سے باندھ کر سڑک پر گھسیٹ رہے ہیں۔

اس ویڈیو کے وائرل ہونے پر ضلعی انتظامیہ کے اہلکاروں کی اس طرزِ عمل کے خلاف مقامی باشندوں میں شدید اشتعال پایا جاتا ہے۔ عوامی حلقوں نے مطالبہ کیا ہے کہ اس واقعے کی تحقیقات کی جائے۔

ضلعی انتظامیہ کے طرف سے اس معاملے میں تاحال کوئی وضاحتی بیان جاری نہیں کیا گیا ہے۔

بعد ازاں، آج نیوز کی خبر پر ایکشن لیتے ہوئے سوات کی تحصیل بحرین میں جانوروں کے حقوق کی بدترین خلاف ورزی کرنے والے چار اہلکاروں کو معطل کردیا گیا۔ معطل اہلکاروں میں تین سینیٹری ورکرز اور ایک ڈرائیور شامل ہیں۔

تحصیل چیئرمین بحرین میاں شاہد علی نے اہلکاروں کے خلاف سخت انکوائری کا حکم دے دیا ہے۔