بالی ووڈ اداکار ورون دھون اور ان کی اہلیہ نتاشا کے ہاں بیٹی کی پیدائش ہوئی ہے۔
ورون دھون کے والد اور بالی ووڈ کے مشہور ڈائریکٹر ڈیوڈ دھون نے ممبئی کے مقامی اسپتال کے باہر میڈیا سے گفتگو کرتے ہوئے بتایا کہ ورون دھون اور نتاشا دلال بیٹی کے والدین بن گئے ہیں۔
ڈیوڈ دھون نے نیک خواہشات کا اظہار کرنے پر مداحوں کا شکریہ ادا کیا۔ اپنے والد کے ساتھ موجود ورون دھون نے کہا کہ سب ٹھیک ہے۔ تاہم بیٹی کا نام اب تک ظاہر نہیں کیا گیاہے۔
بیٹی کی پیدائش کے اعلان کے بعد ارجن کپور، کرن جوہر اور راکول پریت سنگھ سمیت مشہور شخصیات نے جوڑے کے لئے نیک خواہشات کا اظہار کیا ہے۔
مداحوں نے بھی جوڑے کو نیک خواہشات کے پیغامات پہنچائے ہیں۔
ورون اور نتاشا 24 جنوری 2021 کو ایک نجی تقریب میں شادی کے بندھن میں بندھے تھے۔ اس جوڑے نے اس سال کے اوائل میں 18 فروری کو نتاشہ کےحاملہ ہونے کا اعلان کیا تھا۔
