رواں سال 22 اپریل کو لاپتہ ہونے والے ’تارک مہتا کا الٹا چشمہ‘ (ٹی ایم کے او سی) کے اداکار گروچرن سنگھ جمعہ کو گھرواپس آگئے۔

بھارتی میڈیا کی ایک رپورٹ کے مطابق وطن واپسی کے بعد پولیس نے انہیں حراست میں لے لیا جہاں انہوں نے حکام کو بتایا کہ وہ مذہبی سفر پر تھے۔

”تارک مہتا کا الٹا چشمہ“ کے اداکار گروچرن سنگھ لاپتہ

رپورٹ کے مطابق گروچرن سنگھ نے پوچھ گچھ کے دوران پولیس افسروں کو بتایا کہ وہ امرتسر اور لدھیانہ سمیت کئی شہروں کے گردواروں میں ٹہرے تھے۔

تاہم، بعد میں انہیں احساس ہوا کہ انہیں گھر واپس جانا چاہئے، کیونکہ وہ اپنے اہل خانہ کو مطلع کیے بغیر غائب ہوگئے تھے۔

تحقیقات کے دوران یہ بات سامنے آئی کہ، سنگھ ایک فرقے کے پیروکار تھے، جو مراقبہ کرتا ہے۔ جبکہ اداکار نے مراقبہ کے لئے ہمالیہ جانے میں بھی دلچسپی ظاہر کی تھی۔

غور طلب بات ہے کہ، دہلی پولیس نے 26 اپریل کو اس کے والد ہرجیت سنگھ کی گمشدگی کی شکایت درج کرنے کے بعد اغوا کا مقدمہ درج کیا تھا۔

کیا گروچن سنگھ نے خود اپنی گمشدگی کا منصوبہ بنایا تھا

سنگھ کے اہل خانہ نے پولیس سے شکایت میں کہا تھا کہ اداکار 22 اپریل کو رات 8:30 بجے ممبئی کے لئے روانہ ہوئے تھے اور تب سے لاپتہ تھے۔

انہیں آخری بار اسی دن رات 9 بج کر 14 منٹ پر بھارتی دارالحکومت کے پالم کے علاقے میں دیکھا گیا تھا، جبکہ ان کا نمبر 24 اپریل تک فعال تھا اور اسی سے متعدد ٹرانزیکشنز کی گئیں۔

گروچن سنگھ نے 2020 تک مشہور ہندوستانی سیٹ کوم میں سوڈھی کا کردار ادا کرنے کے بعد شہرت حاصل کی۔